09 მარტი, 2018
წყალტუბოს მერმა ღვაწლმოსილი პედაგოგები დააჯილდოვა
გაზაფხულის დღესასწაულები 3 და 8 მარტი წყალტუბოელ პედაგოგებს მუნიციპალიტეტის მერმა გრიგოლ იოსელიანმა, საკრებულოს თავმჯდომარემ გრიგოლ ივანეიშვილმა, მაჟორიტარმა დეპუტატმა ცოტნე ზურაბიანმა, მერის მოადგილეებმა: ზურაბ მაისურაძემ და ალექსანდრე დადუნაშვილმა მიულოცეს.
მერიის კულტურის, სპორტისა და ახალგაზრდობის საქმეთა სამსახურის მიერ ორგანიზებულ შეხვედრაზე დამსახურებულ მასწავლებლებს სამადლობელი სიგლები და სიმბოლური საჩუქრები გადასცეს. -,,თითოეულ თქვენგანს წყალტუბოს საზოგადოება კარგად იცნობს, რადგან ათეული წლების განმავლობაში დიდი შემართებით გასცემდით ცოდნას, სიყვარულს, გვასწავლიდით, გვეფერებოდით, მადლობა დაუღლელი შრომისთვის, გაწეული ამაგისა და ღვაწლისთვის, გილოცავთ დედისა და ქალთა საერთაშორისო დღეებს, იცოცხლეთ დიდხანს, კიდევ ბევრი მოსწავლის გულის კარი გააღეთ და ქვეყანას აღუზარდეთ ღირსეული მამულიშვილები''- ასე მიმართა დარბაზში შეკრებილ პედაგოგებს მუნიციპალიტეტის მერმა გრიგოლ იოსელიანმა.
-,,თქვენ ჩვენი პედაგოგები ბრძანდებით, რომლებმაც ქვეყნისთვის ყველაზე მძიმე წლებში შეიტანეთ უდიდესი წვლილი თაობების აღზრდასა და პიროვნებებად ჩამოყალიბებაში, დაუფასებელია თქვენი ღვაწლი, თუმცა ხორციელდება კონკრეტული ცვლილებები სახელმწიფო დონეზე, რათა იცხოვროთ უკეთესად. გილოცავთ, მუდამ იდექით მომავალი თაობების კარგ ქართველებად, კარგ ადამიანებად, პროფესიონლებად აღზრდის სადარაჯოზე''- განაცხადა წყალტუბოს მაჟორიტარმა დეპუტატმა ცოტნე ზურაბიანმა -,,ერის ინტელექტუალური ძალა, ცოდნის რესურსი არის ჩვენი სახელმწიფოს ყველაზე დიდი სიმდიდრე, მეამაყება, რომ წყალტუბოში ღირსეული პედაგოგები გვყავს, რომლებიც განსაკუთრებით უვლიან ამ განძს და გზას უკვალავენ ახალგაზრდებს, რომლებმაც უნდა ააშენონ მომავლის საქართველო, გისურვებთ ხანგრძლივ სიცოცხლესა და ახალ წარმატებებს'' -აღნიშნა საკრებულოს თავმჯდომარემ გრიგოლ ივანეიშვილმა.
ადგილობრივი ხელისუფლების პირველმა პირებმა და წარმომადენლებმა გაზაფხულის დღესასწაულები ხანდაზმულ, პენსიონერ პედაგოგებსაც მიულოცეს. ყველა შეხვედრა იყო ემოციურად დატვირთული, სავსე მადლიერებითა და სიყვარულით.