16 აპრილი, 2021
„ჩვენი მიზანია, არა მხოლოდ მოსწავლე იყოს წარმატებული, არამედ ოჯახი გახდეს ამ პროცესის უშუალო მონაწილე“ - ელენე კაჭარავა
„ეტალონს“ ბავშობიდან გულშემატკივრობდა და ყოველთვის უნდოდა, ეროვნულ ინტელექტ-ჩემპიონატში მონაწილეობა, თუმცა ახლა უზომოდ ბედნიერია, რომ თავად არის ამ დიდი გუნდისა და ყველაზე მზრუნველი პროექტის წევრი.
ელენე კაჭარავა რამდენიმე თვეა izrune.ge-ს გაყიდვების დეპარტამენტში მუშაობს და ერთმუშტად შეკრულ გუნდთან ერთად, ყოველდღიურად ზრუნავს პატარა იზრუნელების ხარისხიან განათლებასა და სწავლის მოტივაციაზე. თუმცა აჯობებს, ამ ყველაფრის შესახებ, ელენემ თავად გვიამბოს.
- მე ვარ ელენე კაჭარავა, მესამე კურსის სტუდენტი. ვსწავლობ ბიზნესის ფაკულტეტზე მარკეტინგის მიმართულებით.
- როგორ მოხვდი Izrune.ge-ში?
- კომპანიამ გაყიდვების დეპარტამენტში ვაკანსია გამოაცხადა, გავიარე გასაუბრება და გავხდი ამ საოცარი გუნდის წევრი. გამოგიტყდებით, ეს დიდი გამოწვევა იყო ჩემთვის, თუმცა მოხარული ვარ, რომ მომეცა საკუთარი შესაძლებლობების წარმოჩენის საშუალება.
- როგორ ახერხებ, შეათავსო სწავლა და სამსახური; ზოგადად, რას ნიშნავს მუშაობა კომპანიაში, რომელიც საგანმანათლებლო სფეროს ემსახურება?
- ზუსტად ამან მიიქცია ჩემი ყურადღება - საგანმანათლებლო სფერო ყოველთვის მაინტერესებდა და ახლა, როგორც სტუდენტისთვის, მნიშვნელოვანია, სწორედ ასეთ სივრცეში მივიღო გამოცდილება. სწავლაში ხელი არანაირად არ მეშლება, პირიქით, დიდ გამოცდილებას ვიღებ და მაქვს მოტივაცია, სწავლა, ცოდნა და პრაქტიკა ერთმანეთს დავუკავშირო. ამაში კი izrune.ge და „ეტალონის“ გუნდი ძალიან მეხმარება.
- რას სთავაზობს izrune.ge-ს გაყიდვების დეპარტამენტი პატარა იზრუნელებს?
- ჩვენ ვთავაზობთ ისეთ პაკეტებს, რომლებიც კავშირშია არა მხოლოდ ფორმალურ, არამედ არაფორმალურ საგანმანათლებლო სივრცესთან. მიზანია სკოლის, ბავშვისა და ოჯახის მჭიდრო კავშირის დამყარება. პირადი განათლების მენეჯერი კი გვეხმარება ამ მიზნის მიღწევაში - ბავშვებში მოტივაციის ამაღლებაში, არსებული ცოდნის გაღრმავებასა და დამატებით ცოდნის მიღებაში. ჩვენი მიზანია, არა მხოლოდ მოსწავლე იყოს წარმატებული, არამედ ოჯახი გახდეს ამ პროცესის უშუალო მონაწილე. ვერ წარმოიდგენთ, როგორ უხარიათ ბავშვებს, როდესაც ხედავენ მშობლების მხარდაჭერას; მთავარია, პირველივე კლასიდან მოსწავლეებმა უნდა იგრძნონ - ესაა მათი პასუხისმგებლობა და არა ვალდებულება. ჩვენ ვცდილობთ, რომ დეტალურად მივაწოდოთ ინფორმაცია და ავუხსნათ ჩვენი კომპანიის პრინციპები.
- იგებენ?
- რა თქმა უნდა... ზუსტად ხვდებიან, რასაც ვთავაზობთ; აბსოლუტურად სწორად ხედავენ პრინციპსაც და მიზანსაც.
- სხვათა შორის, ამბობენ, რომ მოსწავლის მშობლებთან ურთიერთობა მარტივი არაა...
- ასე არ ვიტყოდი... ყველაზე მნიშვნელოვანი, მშობლისთვის არის შვილი და ყველაფერი, რაც მას შეეხება; ამიტომ ძალიან საფრთხილოა ეს პროცესი და ჩვენც ვცდილობთ, პირველ რიგში, ნდობა მოვიპოვოთ, რაც ნამდვილად არ გვიჭირს, რადგან izrune.ge და „ეტალონი“ ყველამ იცის. თვითონ არიან დაინტერესებულნი ჩვენთან მეგობრობით და ჩვენც გვაქვს პასუხისმგებლობა, დეტალურად იცოდნენ, რაში მდგომარეობს პროექტის პრინციპი. ჩვენ ვცდილობთ, თითოეულ მათგანს გავუმართლოთ იმედები და ვერ წარმოიდგენთ, რამდენ მადლობას ვიღებთ. გვიკავშირდებიან და მადლობას გვიხდიან, რათა მიეცათ შანსი, მონაწილეობა მიეღოთ ასეთ პროექტში. ჩვენთვის კი ძალიან სასიამოვნოა, როდესაც მშობელს აწვდი დეტალურ ინფორმაციას.
- რა შეიცვალა შენთვის მას შემდეგ, რაც izrune.ge-ს გუნდის წევრი გახდი?
- ძალიან ბევრი რამ... პირველ რიგში, თვითშეფასება ამიმაღლდა - ძალიან კარგ საქმეს ვემსახურები, ვცდილობ, ყოველდღიურად განვავითარო საკუთარი შესაძლებლობები, მიღებული ცოდნა დავნერგო პრაქტიკაში და სწორედ ამის საშუალებას მაძლევს izrune.ge. ჩემი მიზანია, ყოველდღე გავაუმჯობესო საკუთრი შესაძლებლობები და არასოდეს დავნებდე. ამასვე ვეუბნები ბავშვებს - izrune.ge-ს დიდი ოჯახის სრულფასოვან წევრებს - შეიძლება იშრომო და რაღაც არ გამოვიდეს, მაგრამ თუ არ იშრომებ, საერთოდ არაფერი გამოვა. მინდა, ეს იცოდნენ და თითოეულ მათგანს, მათზე უზომოდ მზრუნველ კომპანიასთან ერთად ძალიან ბევრ წარმატებას ვუსურვებ.