13 თებერვალი, 2018
ბორჯომში მცხოვრებ უკრაინული დიასპორის შესახებ წიგნი გამოიცა
170-წლიანი ძმობის ისტორია, ცხოვრება ერთად, ჭირსა და ლხინში, ურთიერთობების სრული ჰარმონია და დღემდე სათუთად მოტანილი მეგობრობა - სწორედ ამდენ წლიან ისტორიას ითვლის ქართველებისა და უკრაინელი ხალხის თანაცხოვრება ბორჯომში...
ეს წარსულია, რომელიც კიდევ ერთხელ გვაფიქრებინებს, რომ ეთნიკურად მრავალფეროვანი პატარა ქალაქი-ბორჯომი საუკეთესო მაგალითია ტოლერანტობისა და ხალხთა შორის დამკვიდრებული დიდი სიყვარულის.
მეგობრობის კიდევ ერთი დასტური დაბა ბაკურიანში გამართული წიგნის პრეზენცია გახლდათ. წიგნი, რომელიც უკრაინელთა ბორჯომში 1853-2017წწ. გადმოსახლების ფაქტებსა და უკრაინული დიასპორის სამცხე-ჯავახეთში დამკვიდრების ისტორიას ასახავს საქართველოში მცხოვრებმა უკრაინელმა ბორის სინიუკმა დაწერა.
ბორჯომში მცხოვრები შევჩენკოების, ბანდურების, მარტინენკოების, გავებისა და სხვა მრავალი უკრაინელის ისტორიები ავტორმა სათუთად შეკრიბა და მკითხველს უკრაინული დიასპორის შესახებ დოკუმენტური მასალები პირველმა მიაწოდა.
ამაღელვებელი იყო შეხვედრა დაბა ბაკურიანში მცხოვრებ უკრაინელებთან. დიდი ბებიისა და ბაბუების მიერ მოყოლილი ამბები, ისტორიები, რომლებიც მათ საკუთარ სამშობლოსთან აკავშირებდათ განსაკუთრებული ემოციების მატარებელი იყო.
ავტორმა დამსწრე საზოგადოებას წიგნი საჩუქრად გადასცა. მისი განმარტებით, მრავალეთნიკურ ბორჯომში უკრიანული დიასპორის შესახებ დოკუმენტურად ცოტა მასალა თუ მოიპოვებოდა. მრავალწლიანი მუშაობის შედეგად და ბორჯომის მხარეთმცოდნების მუზეუმთან თანამშრომლობით, შესაძლბელი გახდა ეს უნიკალური მასალები ფართო საზოგადოებისათვის ყოფილიყო ცნობილი.
დაბა ბაკურიანში მცხოვრებ დიასპორასთან შეხვედრა უკრაინის საელჩოს ინიციატივითა და ბორჯომის მუნიციპალიტეტის ორგანიზებით გაიმართა. პრეზენტაციას საქართველოში უკრაინის ელჩი იგორ დოლგოვი, ბორჯომის მუნიციპალიტეტის მერი ლევან ლიპარტია, ბორჯომ-ბაკურიანის ეპარქიის ეპისკოპოსი ლაზარე და მერიისა და საკრებულოს წარმომადგენლები ესწრებოდნენ.